Паэзія была, ёсць і будзе заўсёды там, дзе ёсць светлыя і прыгожыя пачуцці. Таму на нашым мерапрыемстве размова вялася на мове душы, на мове паэтычнага слова.
Наведвальнікі аддзялення дзённага знаходжання грамадзян сталага ўзросту цэнтра сацыяльнага абслугоўвання насельніцтва Ашмянскага раёна на чарговым паседжанні паэтычна-музычнай гасцёўні “Натхненне” сустрэліся з вельмі цікавым і творчым чалавекам, вядомым паэтам Ашмяншчыны Яўгенам Гаўрылавічам Кустом.
Наш госць пазнаёміў прысутных са сваімі творамі аб малой радзіме, а нарадзіўся ён ў адным з самых прыгожых вугалкоў Беларусі – Палессі і, менавіта, адтуль паходзяць яго карані. Вельмі лірычна, прыгожа і душэўна ў выкананні Яўгена Гаўрылавіча прагучалі вершы пра любую матулю.
Чалавек нараджаецца на свет і разам з жыццём атрымлівае ў спадчыну бясцэннае багацце – Радзіму. Яна ў яго адна, другой ніколі не будзе, як не будзе магчымасці кожнаму з нас пражыць другое жыццё. Радзіма дадзена нам Богам. Наш паэт з вялікім задавальненнем пазнаёміў са сваімі новымі творамі, якія прысвечаны роднаму краю. Асабліва пранікнённа прагучалі вершы аб падзеях у Беларусі ў 2020 годзе, а таксама аб чарнобыльскай трагедыі.
Не абмінула творчасць паэта і тэма Вялікай Айчыннай вайны – адной з трагічных старонак у гісторыі нашай краіны. Сама душа прасіла напісаць гэтыя творы, тым самым аддаючы даніну павагі тым, хто падараваў нам сённяшні мірны дзень.
А наступнай паэтычнай старонкай стала лірыка. Яўгенія Янішчыц пісала: “Калі ў душы ад сэрца цесна, то нараджаюцца радкі”. Сапраўды, так. У сваіх лірычных тэкстах аўтар свабодна выказвае свае пачуцці, эмоцыі і адчуванні, свае думкі і разважанні, якія заставілі ўсіх прысутных пранікнуцца тым, чым ён жыве, адчуць і яшчэ раз перажыць гэта як нешта сваё, уласнае, глыбока асабістае. Вельмі кранулі душу ўдзельнікаў мерапрыемства вершы “Жнівень”, “Ты”, “Восень”, якія прагучалі ў выкананні вядучай паэтычна-музычнай гасцёўні.
І яшчэ адна старонка творчасці аўтара заслугоўвае ўвагі. Гэта яго сябры, яго землякі, пра якіх ён нам паведаміў. Сярод іх людзі, якія вельмі знакамітыя на ўсю Беларусь: паэты Леанід Дранько-Майсюк, Георгій Марчук і Уладзімір Глушакоў, краязнаўца і даследчык Міхась Шэлехаў.
Прысутныя пад час сустрэчы даведаліся і пра тое, што Яўген Гаўрылавіч вядомы не толькі ў нашым раёне як шматлікі пераможца раённых конкурсаў, але яго ведаюць як пераможцу абласнога конкурса “Паэзія душы”, які адбыўся ў 2013, 2014 гадах. Ён з’яўляецца лаўрэатам рэспубліканскага конкурсу “Шлях у прафесію”. Зараз працуе выхавальнікам ў УА”Ашмянскі дзяржаўны прафесійна-тэхнічны каледж”.
Мясцовая паэтэса Тэрэса Адашкевіч прысвяціла верш нашаму госцю, які прачытала пры падвядзенні вынікаў сустрэчы.
Наведвальнікі аддзялення шчыра дзякавалі паэту за такія прыгожыя творы і жадалі не страціць у дарозе сэнс жыцця і не загінуць у роздумах і спрэчках, каб тое, аб чым ён марыць – споўнілася.
Вось так у адным чалавеку аб’яднаўся цудоўны свет кахання, дабра і прыгажосці, а нам пашанцавала пазнаёміцца бліжэй з ім і яго творчасцю.
![](https://trudgrodno.gov.by/wp-content/uploads/2024/08/1724155716698-1024x518.jpg)
![](https://trudgrodno.gov.by/wp-content/uploads/2024/08/1724155716719-1024x684.jpg)
![](https://trudgrodno.gov.by/wp-content/uploads/2024/08/1724155716725-1024x643.jpg)