З 21 па 25 лютага ў аддзяленні дзённага знаходжання для грамадзян сталага ўзросту дзяржаўнай установы «Тэрытарыяльны цэнтр сацыяльнага абслугоўвання насельніцтва Іўеўскага раёна» праходзіць тыдзень беларускай мовы.

21 лютага ў рамках Міжнароднага дня роднай мовы ўдзельнікі аддзялення напісалі «Купалаўскую дыктоўку». 22 лютага адбылася віктарына «Беларуская мова – наш скарб», прымеркаваная да Года гістарычнай памяці.

У час мерапрыемства пажылыя людзі ўспаміналі беларускія прыказкі і прымаўкі, народныя прыкметы, адгадвалі загадкі, гулялі ў гульні «Перакладчык» і «Назаві адным словам», знаходзілі падабенствы і адрозненні рускага і беларускага алфавітаў, вучылі скорагаворкі, дэкламавалі вершы на роднай мове.

У аддзяленні прадстаўлена выставачная экспазіцыя кніг беларускіх пісьменнікаў, прадметаў побыту і хатняга ўжывання, ручнікоў «Знаходкі з бабулінага куфра».

Памятаць, ведаць і паважаць сваю мову – абавязак кожнага беларуса, бо мова – гэта душа народа, векавая памяць многіх пакаленняў, наш галоўны нацыянальны скарб. Жыве мова – жыве народ, жыве памяць продкаў.